All Mizoram Farmers' Union

AMFU GENERAL ASSEMBLY VAWI 16-NA LAWNGTLAIAH HMAN A NI

Ni 8th May, 2014 khan AMFU General Assembly vawi 16-na chu CYLA Hall, Lawngtlaiah hman a ni.

General Assembly hi Vice-President Pu C. Lalsawmliana’n a kaihruai a, Rev. Dr. L.H. Lalpekhlua  LIKBK chuan Pathian h nena inhlanna hun a hmang a, President Pu Joseph H. Thanzuala’n thu a sawi a, Pu Zion Lalremruata, General Secretary chuan pawl hmalakna hrang hrang report a pe a, ram kang telhna a nunna chan ralna hun a kaihhruai bawk.  Khuallian leh Khualzahawm ten thu an sawi a, zai thiam hrang hrang zai ngaihthlak a ni bawk.

Pu Zion Lalremruata, General Secretary Report-a a lan danin tunah hian AMFU member hi nuaihkhat leh sangriat kan ni a. Branch 26 leh Sub-Headquarters 16 kan nei mek a ni.

Pu Joseph H. Thanzuala, President chuan he rama awm tur hian Pathianin min ti a, Phura phaizawl te leh hmun hrang hranga kan ram tha tak takte hi kan enkawl tura Pathian min pek a ni. Kan ram leilung, nungcha, thing leh mau, tui te hi humhalh a enkawl hi kan mawhphurh a ni a. Kan chaw rinpui ber Buh hi kan Pi leh Pu ten uar taka an lo chin a an intodelh thin ang khan i uar thar leh i la “Buh ah i kir le hang u” tiin kalkhawmte a fuih a.

Pathianin leh Sorkar zarah malsawmna nasa tak kan dawng a, chuvang chuan tihtak zeta hna kan thawh a ngai a. Kuthnathawktute hi tangrual ila, tumah in elrel mai lovin, in hmangaihtawna leh induhsaktawnna nen, lungrual tak leh hlimtakin, rinawm leh taima takin I thawk ang u tiin AMFU members te leh kalkhawmte a sawm a ni.

He Assembly-ah hian April ni 15 a ram kang thelhna avanga hliam tuar, April ni 17 a thi ta Tv. Lalsiamkima, kum 28 S/o R. Laldawngliana, Buarpui khua hnenah chawimawina thuziak (Citation) leh pawisafai Rs. 10000 (singkhat) pek a ni a. He hun hi Pu Zion Lalremruatan a kaihhruaia kalkhawmte rilru a khawih hle a ni. AMFU in chawimawina a siam hi Tv. Lalsiamkima pa hnenah Pu H. Zothangliana, Parliamentary Secretary chuan a hlan..

He Assembly khuallian Pu Lal Thanhawla, CM chuan AMFU chanchinbu ‘THLAWHHMA’ tih chu a tlangzarh a. Khuallian Chief Minister chuan ram hmasawnna leh intodelhna ramin ke a pen meknaah a fawng chelhtu pawimawh kuthnathawktu mi thahnemngai tam tak kan la nei chu lawmawm a ti hle a. rim taka hnathawktuten an thar chhuah ang ang te hlawk taka an hralh theih nan sawrkar chuan tih tur awm a pianga a tih zel ang a. Kuthnathawktute phena hlawk lo tum ru an awm a nih chuan eng mi pawh nise sawrkarin a ngaithei dawn lo a ni a ti.

Ka ram a lo intodelh theih nana sawrkar hmalakna lian ber NLUP chu a that em avangin UNO te pawhin an rawn zirchiang mek a. Chutihlaiin dik taka kalpui hleithei lo mi tam tak an lo lang chhuak ta chu a pawi a tiin kuthnathawktu kalkhawmte chu dik tak a NLUP kalpui theuh turin a ngen a ni.

Khualzahawm Pu H. Zothangliana, Parliamentery Secretary pawhin thu sawiin kuthnathawktu kalkhawmte chu ram neitu an ni a, chuvangin taima taka thawk tur leh ram hmasawna thawhna kawnga hleihluak deuh a pawisa leh hlawkna lo dawn tum fal lo turin a fuih a. Mizoram sorkar chuan kuthnathawktute leh mi harsate chu a theih tawpin a pui zel dawn a, an lamah a tang tlat dawn a ni a ti.

He hunah hian Chief Minister Pu Lalthanhawla, CM nupui Pi Lal Riliani leh Parliamentary Secretary Pu H. Zothangliana te hnenah AMFU Lifetime membership nihna hlan a ni.

Pu N. Lalzova, Vice President, AMFU Gen. Hqrs. cum President, AMFU Lawngtlai Dist. Hqrs. pawhin thu a sawi a. Ruahpui leh thlipui karah nunna thapa Assembly min hmanpui tura lo kal kan Chief Minister te nupa chungah lawmthu a sawi a, AMFU founder President Pu Vanlalngaite, Khualzahawm Pu H.Zothangliana leh palai kalzawng zawngte chungah lawmthu a sawi a, tluang taka Assembly hmantirtu Pathian hnena lawmthu sawiin hun a khar a

He Assembly second session-ah hian AMFU Constitution siam thatin General Secretary leh Financial Secretary chu Elected post ni tura a pawm tak avangin he post pahnih tan hian inthlanna siam a ni a, General Secretary atan Pu Zion Lalremruata chu chuh tu awm lova thlantlin a ni a, Finance Secretary post ah hian Dr. Chawngkhuma Chawngthu thlantlin a ni.

Hun tawp hi Pu R. Laltluanga, Treasurer chuan Pathian h nenah inhlanna leh tawngtainain a hmang a, chumi hnuah palai kalkhawmte puala siam ruai tui tak kilho nghal a ni.