All Mizoram Farmers' Union

Press Statement on 26.09.2013

ALL MIZORAM FARMERS’ UNION

GENERAL HEADQUARTERS’, Aizawl; Mizoram.

PRESS STATEMENT

Date Aizawl, the 26th Sept, 2013

           Mizoramah Hmunphiah a that duh bakah a hralhna lamah harsatna em em a awm loh avangin hmun hrang hrangah kuthnathawktuten Hmunphiah huan siam kan intihhmuh chho mek a. NLUP hnuaiah pawh Soil & Water Conservation Deptt hnuaiah Trade atan thlan theih niin, chhungkaw tam takin hmunphiah huan siamin hma kan la mek a. Chutih mek lain, Department of Environment & Forest, PCCF Order No. B.19013/1/05-PCCF/16 of dt. 15th February, 2005 tlawhchhanin Mizoram chhungah ( Autonomous District Council 3 areas tel lovin) Hmunphiah Royalty Rs. 7/- per Kg. zela la tura Order siam a ni a. Royalty sang taka lak a nih vang hian Mizorama Hmunphiah chingtuten harsatna hrang hrang kan tawk chhoin, a hralhna lamah pawh a thalo zawngin nghawng thui tak a nei chho a. Tin, Hmunphiah Royalty hi pek a nih hnuah pawh E & F Deptt. Check Gate hmun hrang hrangah te lo ti dingin, Private ram a mi a ni nge ni lo finfiah tumin, Periodic Patta, LSC etc te lo phutin, pawisa chawitir dan mawlh ngaihtuahin harsatna tam tak kuthnathawktu ten kan tawk thin a ni.

          NLUP Apex Board vawi 8-na Dt. 10.05.2011-a neih chuan NLUP hnuaia Hmunphiah chingtute chu Royalty ngaihna thiam nise tiin a passed a. Chutih rualin Forest Officers Meeting, PCCF Chamber-a Dt 02.09.2011 a neih, Memo. No. B. 14.20/7/2009-PCCF in a tarlan dan chuan mimal huana Hmunphiah chinte State pawna hralhte chu Rs. 3.50/Kg zela lak turin a rel a. Hmunphiah hi Mizoram chhungah mimal tam takin mahni ramahte an ching a. Thingtlang hmun tam zawka ching tan chuan P.Patta leh LSC neihte a harsat avangin VC Pass  bak an nei thei lo a. Forest Deptt lam lahin VC Pass te lo pawm lovin, heng mimal huana chingte leh NLUP hnuaia ching zawng zawngte Royalty an lo laksak zel bawk si.

            Tuna kan hriat theih chinah chuan heng kan thenawm state hrang hrangahte, hetiang hian Royalty hi lak a ni:

  1. Meghalaya                       -           Re. 0.36/Kg
  2. Manipur                           -           Re. 0.50/Kg
  3. Nagaland                          -           Re. 0.50/Kg
  4. Assam                               -           Re. 1.0/Kg

        Tin, Hmunphiah chingtu tam tak zingah NLUP tanpuina dawng ve lo tam tak an awm avangin AMFU chuan mimal huan a chingte, NLUP Hmunphiah leh Forest rama mite thliar lova, Re. 1.0/Kg. zela la turin thuneitute hnenah Dt. 10th May, 2013 (Ref. Letter No. AMFU(GHQ)/3/2013-16/114) khan Ultimatum a thehlut a. Hemi umzui hian Pu H. Rohluna, Hon’ble Minister, i/c Environment & Forest Deptt. etc pawh vawi 3 (thum) lai biak a ni a.

          Tin, Environment & Forest Deptt lam hian Royalty rate hi tih hniam hlauin chanchinbuahte Addl. PCCF hminga Press Statement siamin “A hniam zawngin Royalty revise a ni ngai lo, a sang zawng chauhin revised thin a ni” tih thuchhuahte an siam a (Ref. Date. 24th Feb.,2013, Zalen Weekly, Sunday, Front Page). Hetianga thuchhuah an siam dan atang hian Hmunphiah chingtu mi harsa zawkte dinhmun hriatthiamna an neih lohzia chiang takin a lang a. A thu hrimah Royalty rate siam (fix) hi Policy thil (matters) a ni a. Forest Department hian an mahni ngawtin thuneihna an nei lova, lo sawi tur pawh an ni lo. Kan dan hman lai “Mizoram Forest Act, 1955” Section 6 (1) & (2) chuan “Royalty rate bithliah leh revise chungchangah, a sang zawng emaw a hniam zawng emaw, State sorkar thuneihna  ani” a ti a. Forest Department hian State sorkar thuneihna an chuh ve ta mai emaw tih theih a ni.

           Beiseina sang tak nen Sorkar thuneitute hnena kan thu thlente kan ngaihchan laiin, vawiin thlengin chanchin engmah thuneitute lam atanga kan la dawng lo hi AMFU chuan pawi a tiin, hriatthiam har a ti tak meuh a. Sorkar thuneitute hnenah hian lehkha mai bakah Media kaltlangin ngenna vawi tam tak kan lo siam tawh a, heti chung pawha hmalakna pakhatmah awm lo hi kuthnathawktute hmuhsitnaah AMFU chuan a ngai a. Kuthnathawktute hma ngaia siam tha ngei tura kan duhzia lantir nan he Royalty lakna rate sangtak Order hi AMFU General Headquarters’ Executive Committee chuan hal a rel ta a ni. September, 2013 ral hma ngeia Royalty rate uchuak tak  hi, Kg khat ah Re 1 (cheng khat) la tur leh kuthnathawktuten kan tharchhuah hmunphiah zalen taka kan hralh theihnana hma la  turin thuneitute AMFU chuan a ngen nawn leha, he kan ngenna hian awmzia ala nei lo fo a nih chuan NH 54 kawng danchah(Roadblock) a ni ang a, a ṭul chuan Court-ah kan kal zel ang. A tul thuta che thei tura lo inring turin kuthnathawktu zawng zawngte AMFU General Headquartes chuan a hriattir a ni.

               

 

                                                                                  Issued by

All Mizoram Farmers’ Union (AMFU)

General Headquarters, Aizawl, Mizoram.